Zarjadniski předpis Sakskeho statneho ministerstwa za wědomosć a wuměłstwo k spožčenju myta za serbsku rěč Myta Zejlerja

I.
Předmjet myta

Statne ministerstwo za wědomosć a wuměłstwo załoži myto za serbsku rěč Myto Zejlerja. Z Mytom Zejlerja maja so zasłužby na polu přiswojenja, nałožowanja a posrědkowanja serbskeje rěče – wosebje hornjoserbšćiny – hódnoćić.

II.
Mjeno myta

Myto je pomjenowane po basniku, publicisće a duchownym Handriju Zejlerju (1804–1872), kotryž płaći jako załožer moderneje serbskeje literatury a kotrehož twórby maja do dźensnišeho pozitiwny wliw na serbsku rěč.

III.
Wuzwolenske kriterije

1.

Myto Zejlerja spožči so njedźělene jednej wosobinje respektiwnje skupinje wosobow, kotraž je na polu přiswojenja, nałožowanja a posrědkowanja serbskeje rěče – wosebje hornjoserbšćiny – wusahowace wukony docpěła.

2.

Myto Zejlerja so zjawnje njewupisa. Njeje móžno, so wo myto požadać. Čłonojo jury namjetuja kmane wosobiny abo skupiny wosobow. Namjetowanske prawo maja jeničce ćłonojo jury.

3.

Myto Zejlerja spožči so wosobinje respektiwnje skupinje wosobow jenož jónu.

IV.
Dotěrowanje

Myto Zejlerja je z 5 000 EUR dotěrowane. Wone so zhromadnje z wopismom přepoda.

V.
Jury

1.

Wo připóznaću Myta Zejlerja rozsudźi statna ministerka/statny minister za wědomosć a wuměłstwo na doporučenje čestnohamtskeje jury, kotraž so na slědowace wašnje zestaja:

 

a)

zastupjer Statneho ministerstwa za wědomosć a wuměłstwo,

 

b)

zastupjer Rady za serbske naležnosće,

 

c)

zastupjer Domowiny – Zwjazka Łužiskich Serbow z. t.,

 

č)

zastupjer Serbskeho instituta z. t.,

 

ć)

zastupjer wokrjesa Budyšin,

 

d)

zastupjer wokrjesa Zhorjelc a

 

dź)

zastupjer gmejnow serbskeho sydlenskeho teritorija Swobodneho stata Sakskeje.

2.

Wobchodna rěč jury je zasadnje serbska. Předsydstwo jury přewozmje zastupjer Statneho ministerstwa za wědomosć a wuměłstwo. Na časowu dobu šěsć lět po-mjenuja pod čisłom 1 mjenowane institucije po swobodnym rozsudźe wosobinu jako zastupjerja do jury. Statne ministerstwo za wědomosć a wuměłstwo čłonow jury na spočatku wotpowědneho časa zastojnstwa wobkrući. Wospjetne pomjenowanje je móžne.

3.

Po wotchadźe čłona jury ma so hač do kónca šěsć lět trajaceho časa zastojnstwa wot delegowaceje institucije naslědnik postajić a wot Statneho ministerstwa za wědomosć a wuměłstwo wobkrućić.

4.

Za čłonow jury je spožčenje Myta Zejlerja wuzamknjene.

VI.
Jednanje jury

Jury rozsudźi z jednorej wjetšinu hłosow. Při runosći hłosow rozsudźi hłós předsydy. Wuradźowanja jury njejsu zjawne. Přećiwo rozsudej jury njeje prawniske postupowanje móžne.

VII.
Spožčenje

Statne ministerstwo za wědomosć a wuměłstwo spožča Myto Zejlerja dwulětnje w měsće/wjesce serbskeho sydlenskeho teritorija Swobodneho stata Sakskeje. Prěni raz spožci so Myto Zejlerja w lěće 2014. Zakonske prawo na spožčenje Myta Zejlerja njewobsteji.

VIII.
Wozjewjenje

Tutón zarjadniski předpis wozjewi so w němčinje a hornjoserbšćinje.

IX.
Nabyće płaćiwosće

Tutón zarjadniski předpis nabudźe dźeń po swojim wozjewjenju płaćiwosć.

Drježdźany, dnja 16. oktobra 2013

Statna ministerka za wědomosć a wuměłstwo
prof. dr. dr. Sabine Freifrau von Schorlemer